وبخاف عليكِ
رجاء حسين
====
وبخاف عليكِ من الهوا لو يوم لمس شال الدلال
ومن النسيم لو شاف ضفايرك الدهب تلمع تلالي
وبغير عليكِ من القمرسهران يغني لحسنك الموال
م البحر موجُهُ لو رقص على رنة الخلخال
من ييجي كده ألفين سنة وقف الفتى وشاور وقال
عاشقك أنا بالقلب ساكنة ورسم على شطك آمال
كحَّل عيونك بالحنين ولبِّسك تاج الجمال
وقال: راجع لك يا أنا مهما زمان البعد طال
وإن الفراق مهما قسي، دوام فراقنا من المحال
حرجع إليك يا صبية ونحضن أيامنا الخوال
وألبسك توب الحِكم والفن وقميص الكمال
ضحكت حبيبته وفرحها عدى حدود كل الخيال
-------------------------
في قوس قزح فوق الغيوم حلمت بجنة حبها
ليه فكَّرتْ إن الغيوم تتمنى تحرس حلمها؟!
واتخيلت إن القمر بالفرح ضفر شعرها؟!
توب الأمل فضفاض!، حنِّت بلونه كفها
الحلوة نامت في المسا كابوس جثم على صدرها
فتحت عيون الهم ، الصبح ده مش صبحها
زارها الخريف قبل الأوان سرق العطورمن زهرها
نادت على شمس الصباح، غطت بغيمة وشها
يا شمس ليه هانت عليك عشرة سنيني وعمرها
عاتبت شعاع شمس الفرح، ليه ابتعد عن دربها؟!
--------------------------------
صوت السكات مالي الفضا والخوف معشش في الدروب
بصت على موج المرايا بتشوف ملامحها يادوب
ليه المرايا اتكسرت واتكسرت فيها القلوب؟!
والبحر ليه صوته بعيد ووشه مليان بالندوب؟!
والشمس ليه زاد هجرها من قبل ما يحل الغروب؟!
حتى القمر قافل عيونه! عن عشقها ناوي يتوب؟!
خاصم نجومه في حبها، نجم الشمال غاب في الجنوب
وحلف ما يلمع في السما وفي عشق غيرها ما يدوب
-------------------------
فتحت عيونها وقلبها صرخت بعلو الصوت
إمتى الفتى يرجع لنا ولا الميعاد حيفوت؟
وصهيل حصانه يدلنا ولا يخاف زمن السكوت؟!
وبلغوه قلب الصبية من الفراق بيموت
وإن العيون داب كحلها من دمعها المكبوت
توب الجمال سرقوه لصوص وكفنوه في تابوت
ولبسوها الحزن توب غزله خيوط العنكبوت
-------------------
البحر ناقش سر في قلب الصخر منحوت
بكرة الفتى ييجي هنا غازل خيوط شمس وياقوت
يصَحِّي فرحتك من الموت ويكفن الجبروت
ويفك أسوار الجدع يحكي عن المسكوت
ويلبسك توب الجمال وشم الجمال على معصمك مثبوت
وعد البطل ما يتنسي ولحقّه يوم مايفوت
